Кабинетке кіру
JÜREGIMNIÑ JEÑIMPAZY
Біз бұл жобаны өмірлік маңызы бар операцияны күтіп жүрген жандар үшін жүзеге асырып келеміз. Басты мақсатымыз – қоғам назарын трансплантология мәселелеріне аудару және ағза донорлығының маңызы туралы халықтың хабардарлығын арттыру.
2026 жылғы 9 тамызда біз жүгіру фестивалін бесінші рет өткіздік.
Қорытындыны әртүрлі тәсілмен шығаруға болады… Сандарды есептеуге, ұйымдастыру жұмыстарының сапасын талдауға немесе қатысушыларға қарап, олардың қатары жыл сайын көбейіп келе жатқанын көруге болады. Осындай сәттерде атқарылған еңбектің бекер еместігін түсінесің.
Барлығы қалай басталды?
Жоба 2018 жылы 60 адам қатысқан велошеруден басталды. Бұл алғашқы қадам алдағы үлкен жетістіктерге жол ашты. Келесі жылы, яғни 2019 жылы қатысушылар саны екі есе өсіп, 150 адам ұзақ қашықтықты еңсеруге бел буды.
2022 жыл жоба тарихындағы бетбұрыс кезең болды. Біз алғаш рет оны жүгіру фестивалі форматында өткізуді ұйғардық. #непростозабег ұранымен ұйымдастырылған жарысқа 500-ден астам адам қатысып, Ботаникалық бақ аумағынан жүгіруді бастады. Біз әрдайым жаңа белестерге ұмтылдық. 2023 жылы арманымыз шындыққа айналып, EXPO алаңында өткен жүгіру фестиваліне 2000-ға жуық адам жиналды! Бұл спорттың, достық пен шабыттың мерекесіне айналды. Әнші Yenlik-тің қолдауы фестивальге ерекше көңіл күй сыйлап, оны ұмытылмас оқиғаға айналдырды. Жыл өткен сайын HCF Run жобасы ауқымын кеңейтіп, қатысушылардың жүрегінен орын алып, қайырымдылық пен спорт қауымдастығын біріктіретін маңызды бастамаға айналып келеді.
2024 жылы Жүгіру фестиваліне реципиенттер, олардың отбасылары, донорлардың туыстары, дәрігерлер, еріктілер, серіктестер және бейжай қарамайтын азаматтар қатысты. 2025 жылы өмірді қолдау мақсатында 4000 адам жүгіру жолына шықты. Ал 2026 жылы фестиваль алаңында жүрегі мейірімге толы 5000 адам бас қосты.
Неліктен іс-шараны тамыз айында өткіземіз?
Қазақстанда донор жүрегін алғашқы трансплантациялау операциясы 2012 жылғы 8 тамызда кардиохирург Юрий Пя мен чехиялық кардиохирург Ян Пирктің жетекшілігімен жасалды. Бұл оқиға елімізде қайтыс болғаннан кейінгі ағза донорлығының дамуына жол ашты. Жыл сайын 8 тамызға жақын жексенбі күні Heart Center Foundation қоғамдық қорының командасы JÜREGIMNIÑ JEÑIMPAZY («Сен – менің жүрегімнің чемпионысың») жүгіру фестивалін ұйымдастырады.
Қор директоры Мұрат Зауыров:
«Бұқаралық жүгіру жарыстары – бірлік пен қолдаудың тілі. Олар маңызды мәселелерді ашық талқылауға және қоғамның донорлыққа деген көзқарасын өзгертуге ықпал етеді. Біздің жүгіру жарысымыз спорт шеңберінен шығып, адамдарды, бизнесті және бұқаралық ақпарат құралдарын ортақ іс пен оң өзгерістер жолында біріктіретін қуатты әлеуметтік қозғалысқа айналып келеді».
Қор командасы атынан жыл сайын бізбен бірге жүгіру жолына шығатын әрбір қатысушыға алғыс білдіреміз. Біз бұл жобаны өз ісіне шын берілген шағын командамен жүзеге асырамыз. Жарты жыл бойы тынымсыз еңбек етіп, әрбір ұсақ-түйекке дейін мұқият ойластырған кезде сіздердің қуаныштарыңыз бен әсерлеріңізді көз алдымызға елестетеміз.
Сіздердің арқаларыңызда қатысушыларды тіркеуден 41 339 000 теңге жинадық.
Жүгіру фестивалінің сахнасында Шығыс Қазақстан облыстық мамандандырылған медициналық орталығына медицина мамандарының біліктілігін арттыру үшін 3 млн теңге табыстадық. Тағы 6 млн теңге трансплантация саласындағы стратегиялық әріптестік аясында Республикалық трансплантацияны үйлестіру орталығына (РТҮО) бағытталады. Бұл қаражат мамандардың кәсіби құзыреттерін дамытуға және білім беру бастамаларын қолдауға жұмсалады.
Сіздердің арқаларыңызда біз денсаулық, өмірдің құндылығы, сүйіспеншілік пен ризашылық сияқты маңызды мәселелер туралы кеңінен айта аламыз. Жоба туралы пікірлеріңізді жинап, солардың бірқатарын назарларыңызға ұсынғымыз келеді.
«Мен өзім де күту парағындағы тізімінде болдым. Оның қандай екенін, қолдаудың қаншалықты маңызды екенін жақсы білемін. Бүгін біз, реципиенттер, донорлықтың адам өмірін сақтап қалатынының айқын дәлелі болдық. Донорлықтың, адамдардың ең қиын сәтте берген келісімінің арқасында біз тіріміз. Біз трансплантациядан кейін де толыққанды өмір сүруге болатынын дәлелдеп жүрміз. Белсенді өмір сүріп, спортпен айналысып, әр күнімізден қуаныш таба аламыз». – @yyuluya
«Бүгін өмірімде алғаш рет жүгірдім. Әзірге небәрі 1 шақырым болса да, өзімді мақтан тұтамын. Өйткені жүрегіме трансплантация жасалғанына алты айдан сәл ғана асты. Мен үнемі айтып жүргендей, өмір – сыйлық. Рақмет, hcf.run!» – @ielowu
«Бұл жүгіру жарысы спорттың тек жеке рекордтар ғана емес, қолдау, бірлік және маңызды әлеуметтік миссия екенін еске салады. Әртүрлі жастағы мыңдаған адамның ортақ мақсатқа бірігіп, hcf.kz қорының еліміздегі медицина мен трансплантологияны дамытуға бағытталған бастамаларын қолдауға ұмтылғанын көру ерекше әсер қалдырады». – @aikorkewa
«Жүгіру кезінде бізге қолдау көрсеткен еріктілерге ерекше алғыс айтқым келеді. Жүгіріп келе жатып, сіздердің әрбір сөздеріңізді, әрбір айқайларыңызды, әрбір қолдау қимылдарыңызды сезіндім. Кей сәтте жүгіру қиындап, күшім азайып, аяқтарым шаршап, тынысым тарылды… Бірақ сіздердің дауыстарыңызды естіген сайын бойыма қайтадан күш біткендей болды. Сіздер жай ғана қолдау көрсеткен жоқсыздар, бізге қуат бердіңіздер. Өз күш-жігерлеріңізбен жігерлендіріп, күлімдеуге, өзімізді қолға алып, денеміз тоқтауды сұраса да, әрі қарай жүгіруге көмектестіңіздер». – @anchik_14r
Біз медициналық серіктестерді тартып, түрлі орталықтармен бірлесе жұмыс істейміз. Мақсатымыз – осы күні әрбір адамның өз денсаулығы мен аурулардың алдын алу туралы ойлануына мүмкіндік жасау.
Жыл сайын жобаға пайдалы бастамаларды енгізіп келеміз. Соның бірі – check-up аймағы. 2026 жылы бұл аймақта Univercity Medical Center, Tulip Medicine, Kinetic, «Оптика Народная», Prime Green Clinic, NeoClinic және Трансфузиология орталығы қызмет көрсетті. Аймаққа барлығы 1261 өтініш түсті. Нақты сандық деректермен расталған бағыттар бойынша 950 медициналық тексеру, консультация және емшара тіркелді. Донорлық қан қабылдайтын мобильді пунктке 68 адам жүгініп, олардың 37-сі қан тапсырды.
Health inform аймағында қандай жұмыстар жүргізілді:
Әлеуметтік медициналық сақтандыру қоры барлық қатысушыға консультация берді. Трансплантацияны және жоғары технологиялық медициналық қызметтерді үйлестіру республикалық орталығы мамандары фестиваль аумағындағы келушілердің сұрақтарына жауап берді. Дәстүр бойынша барлық қатысушы жүрек-өкпе реанимациясы бойынша тегін шеберлік сабағына қатысу мүмкіндігіне ие болды.
Аймақ жұмысының нәтижелері: 1 630 адамға консультация берілді; 600 ақпараттық материал таратылды; 243 адам BLS (базалық жүрек-өкпе реанимациясы) бойынша шеберлік сабақтарына қатысты.
Биыл алғаш рет реципиенттердің өмір жолымен жақынырақ таныстыру мақсатында арнайы көрме аймағын ұйымдастырдық. Мұнда келушілер олардың оқиғаларымен танысуға мүмкіндік алды. Қазір бұл экспозиция Астана қаласы, Тұран даңғылы, 38 мекенжайындағы UMC Жүрек орталығының аумағында орналасқан.
Қатысқан әрбір жанға алғысымыз шексіз!
Келесі жылы сіздермен қайта қауышуды асыға күтеміз.
Құрметпен, Қор командасы.
Іс-шаралары
Сұрақтар мен жауаптар
Іс-шараның негізгі мақсаттары:
– трансплантология мәселелеріне назар аударту;
– донорлықтың маңыздылығы туралы ақпараттандыруды арттыру;
– өмірлік маңызды операцияны күтіп отырғандарға моральдық қолдау көрсету.
Жүгіру фестивалі маңызды әлеуметтік миссияның бір бөлігі болғысы келетіндерді біріктіреді.
Дәрігерлер мен мамандарға арналған білім беру бағдарламаларына;
Трансплантацияны үйлестіру жөніндегі республикалық орталықтың бастамаларына.